ناديت يا شام
ردت هالقلب موجوع
دق الحزن ع القلب فتحتلو الضلوع
شفت الأسد
بإيده عميودع على الدنيي السما
وحوله ملايكة السما تهدي الجموع
والناس متل السيف رافعينه طلوع
يا ريت يرجع هالزمان رجوع

ولا أسمع هبوب الهوا
ولا شوف بيرق هالعزا مرفوع
يا شام
يا شام
لمّا الأسد بينام
بتتيتّم الأيام
بتقرا ع حالا الفاتحة
بتقلك عليك السلام
طلع الصبح لابس سواد الليل ع أسده
حنوا الدني بشار
حمل الحزن عن بلده
قللوا الأسد للموت ما عندي وقت
خليك ناطرني على باب الزمان
ما بتغمض العين حتى يزينوا الجنة بعلم لبنان
ويمرق على قانا المسيح يبارك الشطآن
ويلبسوا أهل الجنوب العبي
من أنوال مطرزة بقرآن
وحده الأسد
وقف هبوب الريح عن لبنان
خلا السفينة تغلب الطوفان
ردّ الخضر من قلب هالتنّين
ضوا الشمع لصورة العدرا
فرحت كنيسة ع جبل صنّين
وحده الأسد رد الزمان
رد الصبح ع الميدنة ورد لنا لبنان
قلتلّنا :
بدنا نعمر وطن مهما إجا من ويل
والوقت ما بينطر حدا لمن بتصهل خيل
ما بقا يساع النهار منستعير الليل
بوعدكن بهالتعب يللي يهد الحيل
هـ الميل ميل القدس والبحر من هـ الميل
ونحنا السد العلي الواقف بوج السيل
وإن عتّمت ضوّوا القمر
يما احرقوا هـ الليل

قلتلّنا :
دقّت طبول الحرب
هبينا سوى لبّيك
والخيل مسروجة وعينيها شاخصة بعينيك
ناطرا تقللا اهجمي
وبس تهجك الخيل بتقلّك
سلام عليك
وهجمت هجمة أسد
دعسة الموت تحت اجريك
والأرض بقيت واقفة ومتمسكة بإيديك
قلتلّنا :
دم الشهيد على أرض الوطن حنة
أشرف الناس وأنبل هـ البشر هني
بس تزعل الأرض بتخلو السما تغني
وبس تغلب الموت بتزغلطلك الجنة
والسلم سلم الأسد
عينه دهر بتشوف لقدام
نحنا بلاد الشام تحت قناطرنا بتحني القمر هالأيام
منا صحاب النبي اللي كسروا الأصنام
ولمن رمينا باب خيبر كبّر الإسلام